Menua

Menua tiyir gazik ke Urartu mali -810 AGJ kali -786. Tiyir nazbeikye is direik ke Ishpuini.

Bak inaf gazugal, Urartu vanpir ware logijarotifu. Va Alzi gola wale ticefa Tigra kuksa isu Eufratos levrotir aze kaik ban bost va gazik ke Milid koe Gurgum gola gruider.

Bata tawavofa divlizera tir do tugodjara va idjafa rictula altogisa va vanblis gades runt. Tuke Menua jowa ke Urartu va Aras is ticef Eufratos kale domega ke Urmia uzda kalfid.

Menua dere tir jontikote kolnasik, va yon wid iu ralma isu dopewa is aryona cugexa vegedur, i va tulon atcom ke Kaleshin ontineon ice 3000 m- wetce ninke ke befoltafa vawa.

Menuakhinilli tite Ararat mefta tir tana widava vegeduyuna gan Menua. Konak narilt is andus bolk koe gazaxo dere zo voneyed. Tan tiyir Menua narilt ( dire yoltayan gu Semiramis narilt ) abrotcaf gu 50 km- koe Van gola dem cel vas 1500 ik 3000 l-/v-. Konakbat narilt re wan zo faved.

« Nope kuranira ke Haldi, Menua nazbeikye ke Ishpuini va bat narilt vegeduyur. Yolt ke bat narilt tir Menua narilt. Gijarotifa Menua pof gazik, gazik ke Biayni, sersik ke Tushpa wid ; Narilt gu crakefi Haldi ikapulvir : ede bettan va bat kosuteks co kidar, bettan co trovgar, bettan va cobaja yolton gu intafa kuranira ik artan co askir, pune Menua mowalzer da crakef Haldi lorik isu Teisheba isu Shivini div wira ke awalt co di relvad. » — Froya ke Semiramis narilt vegeduyun gan Menua

Teni gazugal, Inushpua nazbeikye dogazayar, voxen to Argishti I are nazbeikye va ina radimifir.